Sababta Ay U Fashilmaan Istaraatijiyado Badan: Maaha Istaraatijiyad Dhab Ah

Maanta oo ay ganacsiyadu si xawli ah isu bedbedelayaan, shirkado badan ayaa sameeya maalgelin ballaaran oo ku saabsan qorshayaal istiraatijiyadeed. Hoggaamiyeyaasha shirkaduhu waxay galaan shirar dheer, waxay la shaqeeyaan la-taliyayaal khibrad leh, waxayna diyaariyaan dukumiintiyo muuqaal ahaan aad u qurux badan. Si kastaba ha ahaatee, dadaalladaas badan ee muuqda ka sokow, istaraatijiyado badan ayaa ugu dambayn fashilma. Fashilkaasina inta badan ma aha fulin la’aan, balse waa in qorshaha la sameeyay uusan ahayn istiraatijiyad dhab ah bilowgiiba.

Khaladka ugu weyn: Himilooyin loo fasirto istaraatijiyad

Istaraatijiyad dhab ah ma aha keliya riyooyin fog ama liisyo yoolal ah. Hadalka ah, “Waxaan rabnaa inaan noqonno kuwa ugu sarreeya suuqa,” ama “Waxaan doonaynaa inaan macaamiisha farxad gelinno,” keligood istiraatijiyad ma noqon karaan; waa himilooyin. Inkasta oo ay muhiim yihiin, himilooyinkaasi waxay noqonayaan wax madhan haddii aanay la socon waddo cad oo lagu gaarayo.

Istiraatijiyad dhab ah waxay ku salaysan tahay laba su’aalood oo asaasi ah:

Halkee ayaan ku tartamaynaa? (Waa maxay suuqyada, macaamiisha, badeecadaha, ama goobaha aan diiradda saari doonno?)
Sidee ayaan ugu guuleysan karnaa? (Waa maxay waxa naga dhigi doona kuwo ka duwan kuwa kale, una horseedi doona guul?)

Haddii aan su’aalahan si cad looga jawaabin, ururku wuxuu halis ugu jiraa in uu isku furo howlo kala duwan oo aan iswaafaqsanayn, taasoo keeni karta in la khasaaro waqti, dadaal iyo dhaqaale.

Waa maxay istaraatijiyad dhab ah?

Sida uu sheegay khabiirka istiraatijiyadda Richard Rumelt, istiraatijiyad wanaagsan waxay ka kooban tahay saddex arrimood:

Falanqayn qoto dheer: Faham cad oo ku saabsan caqabadaha ama fursadaha haysta ururka.
Qaanuun hagaya: Go’aan guud oo tilmaamaya jihada la qaadanayo si caqabadahaas loola tacaalo.
Ficillo isku xidhan: Talaabooyin si nidaamsan isugu xidhan oo hirgeliya qaanuunka hagaya.

Haddii midkood maqan yahay, waxa la helo ma noqonayso istaraatijiyad; waxaase la helayaa himilo iyo hawlo aan xiriir lahayn.

Astaamaha muujinaya inaysan jirin istiraatijiyad dhab ah:

Hadallo guud oo aan la socon waddo lagu fuliyo (e.g., “Aan noqonno kuwa ugu fiican”).
Liisas hawleedyo badan oo aan kala hormar lahayn.
Caqabadaha jira aan si dhab ah loo falanqeyn.
Yoolal isburinaya (e.g., in la bixiyo adeeg tayo sare leh oo isla markaana aad u jaban).

Waa maxay muhiimadda ay leedahay istiraatijiyad dhab ah?

Marka urur aan lahayn istiraatijiyad dhab ah, waxa uu lumiyaa hanti, waqti, iyo dadaal. Shaqaalaha waxay ku wareeraan go’aanno aan la fahmin, hoggaamiyeyaashana way ku adkaataa kala hormarinta kheyraadka. Ururkaas wuxuu noqonayaa mid mar walba falcelin ku jira (reactive), halkii uu noqon lahaa mid leh jihayn cad (proactive).

Laakiin haddii istiraatijiyad dhab ah la helo, waxa laga helaa:

Jihayn qeexan oo dadka oo dhan fahmi karaan.
Dadaal mideysan oo isku xiran.
Go’aanno degdeg ah oo sahlan.
Kala dambayn iyo nidaam hagaya horumar waara.

Sidee loo sameeyaa istaraatijiyad dhab ah?

Si looga fogaado qaladka ah in yool loo maleeyo istiraatijiyad, hoggaamiyeyaasha waa in ay:

Si qoto dheer u falanqeeyaan xaaladda dhabta ah.
Doortaan jihada saxda ah ee la raacayo.
Sameeyaan qaanuun kooban oo qeexaya sida looga bixi karo caqabadaha.
Kheyraadka, kartida shaqaalaha, iyo howlaha la jaan gooyaan istiraatijiyadda la sameeyay.

Xilligan adag ee isbeddelka degdegga ah, shirkado badan waxay ku dhacaan dabinka qorshayaal muuqaal ahaan qurux badan, balse aan lahayn tiirar adag. Si kastaba ha ahaatee, guusha dhabta ahi waxay raacdaa hay’adaha leh istiraatijiyad qeexan, go’aan cad, iyo ficillo midaysan.

Haddii aad dooneyso guul waarta, maskaxda ku hay: Istiraatijiyado badan waa ay fashilmaan sababtoo ah ma’ aha istiraatijiyad dhab ah. Fahamka xaqiiqadaasina waa tallaabada ugu horreysa ee guusha.

Taking too long?

Reload document

Open in new tab

Download [219.04 KB]

………………………………………………………………………………………